Nielsen barlag kompaniýasy «Oskar» baýragynyň 95-nji gowşurylyş dabarasyny göni ýaýlymda gören tomaşaçylaryň resmi sanyny yglan etdi. Amerikanyň Birleşen Ştatlarynda ABC ýaýlymyndaky goýberilişe jemi 18,7 million adam tomaşa etdi.
Dabara bilen bir wagtyň özünde geçirilen «Biziňkileriň soňkulary» jemleýji bölümdäki bäsleşige garamazdan, «Oskaryň» görkezijileri, geçen ýylky dabara bilen deňeşdirilende (15,36 mln), 12 göterim ýokarlandy. Şeýle-de, ösüşe 2022-nji ýylda iň köp girdeji gazanan iki sany - «Awatar: Suwuň ýoly» we «Top Gan: Mewerik» blokbasterleri täsirini ýetirdi: birinjisi iň gowy wizual effektler üçin, ikinjisi bolsa ses üçin baýrak aldy.
«Oskarlarynyň» sany boýunça öňdeligi Denielleriň (7) «Hemme zat hemme ýerde we birbada» diýen manysyz dramasy eýeledi. Lenta iň oňat film, režissurasy, ssenariýesi we üç sany aktýorçylyk işi üçin baýrak aldy. Jimmi Kimmel dabarany alyp barmak üçin gaýdyp geldi. Baýrak alanlaryň doly sanawyny şu ýerden tapyp bilersiňiz.
Taryhda iň köp tomaşaçyly dabara Jeýms Kemeronyň «Titanigi» - 55,3 million tomaşaçy bilen, 1998-nji ýyldaky «Oskar» bolup galýar. Soňky on ýylda 2014-nji ýylda geçirilen gowşurylyş dabarasy (43,6 mln) iň köp tomaşa edildi.
