Dünýäniň nebit önümçiligi we ätiýaçlygy boýunça iň uly kompaniýasy bolan Saudi Aramco-nyň 2022-nji ýylyň jemi boýunça arassa girdejisi bir ýyl ozalky 110 mlrd dollara garşy 161,1 mlrd dollar boldy. Şeýle hasabat kompaniýanyň habaryndan gelip çykýar diýip, TASS habar berýär.
Şeýlelik bilen görkeziji 46,5% ýokarlandy.
Kompaniýanyň rekord derejeli maliýe görkezijileri nebitiň bahasynyň ýokary bolmagynyň we satuw göwrüminiň hasabyna, şeýle-de gaýtadan işlemegiň marža görkezijileriniň gowulaşmagy netijesinde gazanyldy. Saudi Aramco-nyň dördünji çärýekde diwidend tölegleri 19,5 mlrd dollar bolar.
2022-nji ýylda kompaniýanyň erkin pul akymy 148,5 mlrd dollar bolup, 2021-nji ýyl bilen deňeşdirilende 38% ýokarlandy. Kompaniýanyň maýa çykdajylary 18% ýokarlanyp, 37,6 mlrd dollara ýetdi. 2023-nji ýylda bu görkeziji 45-55 mlrd dollara çenli ýokarlanyp biler diýlip, kompaniýada bellenilýär.
2022-nji ýylda Saudi Aramco-nyň uglewodorod önümçiliginiň ortaça derejesi günde 13,6 mln barrel nebit ekwiwalentine deň boldy. Suwuk uglewodorod önümçiliginiň göwrümi 11,5 mln b/g boldy.
