Apple kompaniýasy täze Apple Music Classical goşundysyny çykardy. Ol nusgawy sazlary diňlemek üçin aýratyn pleýerdir. The Verge neşiriniň habar bermegine görä, goşundy eýýäm AppStore-da peýda boldy, ýöne resmi taýdan ilkinji görkezilişi entek 28-nji martda geçer. Işläp taýýarlaýjylar ýakyn wagtda Android gurluşlary üçin uýgunlaşdyrylan goşundynyň wersiýasynyň peýda boljakdygyny wada berdiler.
"Apple Music Classical dünýädäki iň uly nusgawy saz katalogynda doly amatly gözleg bilen islendik ýazgyny tapmagy çaltlaşdyrýar we aňsatlaşdyrýar hem-de diňleýjiler ýokary ses hilinden lezzet alyp, giňden ýaňlanýan ses bilen halaýan nusgawy aýdym-sazlaryny täzeçe diňläp bilerler" - diýip, kompaniýanyň metbugat habarnamasynda aýdylýar.
Katalogda jemi 5 milliondan gowrak aýdym-saz bar. Şeýle hem, müňlerçe "giňişlik" ses ýazgysyny öz içine alýar. Sazy kompozitor, eser, dirižýor ýa-da katalog belgisi bilen gözläp bilersiňiz. Goşunda adaty Apple Music-e abuna ýazylyp girip bolýar.
Goşundy iOS 15.4 we has soňraky gurluşlary goldaýar. Kompaniýa Apple Music Classical-yň "tutuş dünýäde, Apple Music-iň hödürlenýän ýerinde” elýeterlidigini aýtdy.
