Bellator-da türkmenistanly ilkinji söweşiji Döwletjan Ýagşymyradow şu gün irden Julius Englikas bilen duşuşdy. Türkmenistanyň hem-de Litwanyň wekilleriniň tutluşygy Koliforniýada Bellator 292 ýaryşynyň çäklerinde geçirildi.
Tutluşyk meýilleşdirilen her biri 5 minutlyk 3 raundlap dowam etdi. 3 raundda hem artykmaçlyk Döwletjanyň tarapynda boldy. D.Ýagşymyradow teýkdaunlar boýunça 3:0 hasapda ýeňdi hem-de parter söweşinde 2 minuda golaý artykmaçlyk gazandy. Şunuň bilen baglylykda, Türkmenistandan gelen söweşiji eminleriň biragyzdan gelen karary bilen ýeňiş gazandy.
Döwletjan Ýagşymyradow üçin bu ýeňiş garyşyk söweşlerde 20-nji we Bellatorda ikinji ýeňşidir. Englikas bolsa, öz gezeginde, karýerasynda 14-nji söweşinde dördünji gezek ýeňlişe sezewar boldy.
Öň, Döwletjan Ýagşymyradow 2022-nji ýylyň aprelinde Bellator 277 ýaryşynda braziliýaly Rafael Karwalýodan üstün çykyp, Bellatorda ilkinji ýeňşini gazanypdy.
