Ispaniýaly tennisçi Rafael Nadal 2005-nji ýyldan bäri birinji gezek dünýäniň iň gowy on tennisçisiniň hataryndan çykar.
3-nji martda ABŞ-ly tennisçi Teýlor Frits Akapulkoda (Meksika) geçiriljek ATP-500 kategoriýasynyň ýaryşynyň ýarym finalyna çykdy. Şeýlelikde, Indian Wellsdäki ýaryşdan soň Nadalyň ilkinji onlugyň sanawyndan çykjagy belli.
Nadal soňky gezek 2005-nji ýylyň 25-nji aprelindäki dünýäniň iň gowy on tennisçisiniň hataryna girmedi. Ol yzly-yzyna 912 hepdeläp dünýäniň iň gowy 10 tennisçisiniň hataryna girip geldi.
Australian Open-iň ikinji tapgyrynda amerikaly tennisçi Makkenzi Makdonald bilen geçirilen oýunda Rafael Nadalyň şikes alandygyny ýatladýarys. Tennis oýunçysynyň MRT barlagy onuň çep aýagynyň ýanbaş-bil etiniň gypjynandygyny görkezdi. Ispaniýaly türgen ondan öň Dohadaky we Dubaýdaky ýaryşlardan, şeýle hem 5-nji martda Las Wegasda (Newada ştaty, ABŞ) watandaşy Karlos Alkaras bilen geçmeli sergi oýnundan aýrylypdy.
