2024-nji ýylda Samsung flagman smartfonlaryny has köp çykarmagy, şol sanda çeýe gurluşlaryň model hataryny giňeltmegi göz öňünde tutýar. Bu barada RGcloudS insaýderi habar berýär.
Çeşmäniň berýän habaryna görä, indiki ýyl Günorta Koreýanyň ägirdi birbada alty sany eplenýän gurluşy hödürlär. Olaryň arasynda täzelenen Galaxy Z Flip we Z Fold, şeýle hem täze Galaxy Z Flex, Z Flip Ultra, Z Fold Ultra we hatda Z Tab planşetleri hem bolar.
Insaýder Z Fold Ultra modelleriniň Samsung tarapyndan öndürilen 4K durulykdaky displeýlerini hödürlejekdigini, adaty wersiýalarynda bolsa BOE tarapyndan öndürilen QHD ekranlarynyň boljakdygyny öňe sürýär. Z Flip smartfonlary BOE -den Samsung 2K ekranlaryny ýa-da Full HD panellerini aljakmyş.
Düýbünden täze Galaxy Z Flex iki ýerden akkordeon ýaly eplenip bilýän smartfondyr. Galaxy Z Tab diýlip atlandyrylýan gurluş eplenýän planşet bolar. Entek jikme-jik maglumat ýok.
Mundan başga-da, çeşme Samsung -yň geljek ýyl Galaxy K atly ortatap smartfonlaryny hem çykarjakdygyny we Galaxy S24 + flagman modelinden ýüz öwürjekdigini öňe sürýär.
