Ýaponiýanyň Toyota awtokonserni ýerli professional birleşikleriň talaplary bilen doly ylalaşyp, öz işgärleri üçin aýlyk haklaryny soňky 20 ýylda iň uly derejede artdyrmagy maksat edinýär. Bu barada NHK teleýaýlymy habar berdi diýip, TASS belleýär.
Bellenilişi ýaly, Toyota eýýäm üçünji ýyl professional birleşikler tarapyndan öňe sürülýän şertler bilen doly ylalaşýar, ýöne zähmet haklarynyň şu gezekki artdyrylmasy soňky 20 ýylda iň ulusy bolar. Häzirki wagtda dürli kategoriýaly işgärler üçin takyk aýlyk haklary barada maglumat berilmedi, ýöne maksimal artdyrma 9 370 ýena (häzirki hümmet boýunça $70) bolar.
Kompaniýanyň ýolbaşçylygy dünýäde çig malyň, azyk harytlarynyň we energiýa göterijileriniň bahalarynyň ýokarlanmagy bilen geçen ýyl ýurtda ýüze çykan inflýasiýa basyşynyň esasynda zähmet töleglerini ýokarlandyrmagyň zerurlygyna doly düşünýändigini belledi.
