Birinji nesil iPhone telefony auksionda 63 356 dollara satyldy diýlip, auksiony geçiren London Capital Group Auctions-yň saýtynda habar berilýär. Muny incrussia.ru ýetirýär. 15 ýyl ozal Apple ilkinji iPhone-y 599 dollara satypdy – bu gurluşyň häzirki bahasynyň ilkibaşky bahadan 100 esse ýokarydygyny aňladýar.
Auksion 2-nji fewralda açyldy. 2007-nji ýylyň iPhone-y üçin söwda 2,5 müň dollardan başlandy. Onuň 50 müň dollara satylmagyna garaşylypdy. Söwda 19-njy fewralda ýapyldy we gutarnykly baha 63 müň dollardan geçdi.
2007-nji ýylda peýda bolan Apple smartfonlarynyň 3,5 dýuým ekrany, 4 ýa-da 8 Gb ýady we 2 Mp kamerasy bardy.
Insider neşirinden reportýorçy Sara Jekson auksionda satylan iPhone telefonynyň tatu ediji Karen Grine degişlidigini anyklady. Bu telefon oňa sowgat berlipdir, ýöne ol hatda gutusynam açmandyr. Bu iPhone-yň Verizon simsiz tor üpjün edijisini götermeýändigi bilen baglanyşykly eken.
Grin ençeme wagtlap iPhone-y satmak isläpdir. 2022-nji ýylyň oktýabrynda ol LCG Auctions bilen habarlaşyp, 2007-nji ýylyň başga bir birinji nesil Apple smartfonynyň tas 40 müň dollara satylandygyny bilýär. Şonda Grin şol wagt tatu salonyny açmak üçin pul gözleýändigi sebäpli telefony satuwa çykarmak kararyna gelýär.
