Amerikaly aktýor Ostin Batler “Iň gowy erkek keşbi” nominasiýasynda Britaniýanyň Kino we telewizion sungaty akademiýasynyň (BAFTA) baýragyna mynasyp boldy. 31 ýaşly aktýora bu baýragy Baz Lurmanyň “Elwis” filminde rok-n-rollyň şasy Elwis Presliniň keşbi getirdi. Bu barada TASS habar berýär.
Bu Batleriň karýerasyndaky ilkinji “bürünç maskadyr”. Öň ol bu keşbi üçin “Altyn globus” baýragyna eýe boldy we “Oskar” baýragy üçin dalaşgärleriň hataryna goşuldy.
“Iň gowy zenan keşbi” üçin baýraga Keýt Blanşett mynasyp boldy. 53 ýaşly awstraliýaly aktrisa ony Todd Fildiň “Tar” dramasynda dirižýor we kompozitor Lidiýa Taryň keşbi üçin aldy. Bu Blanşettiň karýerasyndaky dördünji “bürünç maskadyr”.
Öň, ol bu kino baýragyna 2014-nji ýylda (“Žasmin” filmindäki keşbi üçin), 2005-nji ýylda (“Awiator”) we 1999-njy ýylda (“Ýelizaweta”) mynasyp bolupdy. “Tar” filmindäki keşbi Blanşette ýanwar aýynda “Altyn globus” baýragyny we “Oskar” üçin nominasiýany getirdi.
Ikinji plandaky hem erkek, hem zenan keşpleri üçin baýraklary “Inişeriniň banşisi” filmindäki aktýorlar – Barri Keogan bilen Kerri Kondon aldy.
