Germaniýaly režissýor Edward Bergeriň “Günbatar frontda üýtgeşme ýok” dramasy Britaniýanyň Kino we telewizion sungaty akademiýasynyň (BAFTA) baýragyna mynasyp boldy. Kino pudagynda bu abraýly baýragyň 76-njy gowşurylyş dabarasy Londonyň “Sautbenk merkezi” toplumyndaky Patyşalyk festiwal-zalynda geçirilipdi diýip, TASS habar berýär.
Nominasiýa sany boýunça öňdebaryjy bolan bu film dalaş eden 14 baýragynyň 7-sini aldy. Ýagny, ol “Iň gowy film”, “Iň gowy režissýorlyk işi”, “Iň gowy adaptirlenen ssenariýa”, “Iňlis dilinde bolmadyk iň gowy film”, “Iň gowy operatorlyk işi”, “Iň gowy film aýdym-sazy” we “Iň gowy ses” nominasiýalarynda akademiýa tarapyndan sylaglandy.
Iki sagatlyk film Erih Mariýa Remarkyň adybir romanyna (1898 – 1970) esaslanyp, onda 19 ýaşly Paul Boýmer tarapyndan Birinji jahan urşunyň elhençlikleri beýan edilýär.
Filmiň režissýorynyň aýtmagyna görä, Remarkyň ýüzlenmesi XXI asyrda-da öz aktuallygyny ýitirmedi.
“Bürünç maskalaryň” sany boýunça ikinji orny Martin MakDonanyň “Inişeriniň Banşisi” we Baz Lurmanyň “Elwis” filmi paýlaşdy. Olaryň ikisi-de dört baýraga mynasyp boldy.
Iň gowy hudožnik-ýola goýujynyň işi üçin baýragy Demýen Şazelliň “Wawilon” dramasy, iň gowy wizual effektler üçin baýragy bolsa Jeýms Kemeronyň “Awatar: Suwuň ýoly” filmi aldy.
Režissýor Deniel Roeriň “Nawalnyý” lentasy bolsa “Iň gowy dokumental film” hökmünde baýraga eýe boldy. Iň gowy multiplikasion film diýlip “Pinokkio Gilýermo del Toro” saýlandy.
