Lukmançylyk ylymlarynyň doktory, Russiýanyň Zähmet Gahrymany, Moskwanyň baş anesteziolog-reanimatology, asly aşgabatly Denis Prosenko Türkmenistan bilen Russiýanyň arasynda saglygy goraýyş pudagynda hyzmatdaşlygy ösdürmegiň ýol kartasynyň iki hepdäniň içinde taýýar boljakdygyny aýtdy.
Prosenko, rus lukmanlarynyň Aşgabat şäherine amala aşyran iş saparyndan soň, «Neýtralnyý Türkmenistan» gazetine beren interwýusynda:
«Klinikalarymyzda türkmen kärdeşlerimizi diňe bir nazary tejribeleri alyşmak üçin däl, eýsem, amaly endikleri paýlaşmak üçin hem görjekdigimize begenýäris» - diýdi.
Moskwanyň baş anesteziolog-reanimatologynyň belleýşi ýaly, türkmen kärdeşleri bilen bolan duşuşykda ynsanperwerlik gatnaşyklary we türkmen lukmanlary bilen özara pikir alyşmak, klinikalar bilen özara aragatnaşyk saklamagyň we mundan beýläk hünär taýdan ysnyşykly işlemegiň meýilnamalary ara alnyp maslahatlaşyldy.
Saparyň dowamynda rus hünärmenleri Türkmenistanyň Myrat Garryýew adyndaky Döwlet lukmançylyk uniwersitetine, Onkologiýa hem-de Enäniň we çaganyň saglygyny goraýyş ylmy-kliniki merkezlerine we Halkara hirurgiýa merkezine baryp görmek bilen, Türkmenistanyň saglygy goraýyş ulgamyna ýokary baha berdiler.
Işgärleri taýýarlamak meselesine degip geçen Prosenko täze Türkmen-Russiýa uniwersitetinde «lukmançylyk fakultetiniň bolmalydygyny we boljakdygyny» aýtdy.
«Lukmançylyk wekiliýetiniň» düzümine Russiýanyň Saglygy goraýyş ministriniň orunbasary Tatýana Semýonowa, N.N. Blohin adyndaky Milli onkologiýa merkeziniň müdiri Iwan Stilidi, Moskwanyň A.S Loginow adyndaky kliniki ylmy-amaly merkeziniň müdiri Igor Hatlow we "Kommunarka"-nyň düzümden daşary baş anesteziolog-reanimatolog hünärmeni Denis Protsenko girdi.
