Britaniýanyň Genesis topary Forbesiň wersiýasy boýunça 2022-nji ýylda iň köp girdeji gazanan meşhurlaryň sanawynda birinji orunda durýar. Umumylykda sanawdakylar geçen ýyl jemi 1,3 milliard dollardan gowrak girdeji gazandylar. Reýtingi düzüjiler 1960-njy ýyllaryň progressiw-rok stiliniň pionerleriniň 2022-nji ýylda 230 million dollar gazanandygyny hasapladylar.
Aýdym-sazlaryna bolan hukuklaryň Concord Music Group toparyna satylmagy, gastrollardan alynýan haklar we kompozisiýalaryny ulanandyklary üçin goýberilýän pullar topara bu görkezijini gazanmaga kömek etdi. Azajyk tapawut bilen ikinji ýeri başga bir iňlis ýerine ýetirijisi - Sting eýeledi. The Police-iň öňki agzasy bir ýylda 210 million dollar gazanmagy başardy. Sazanda öz ähli sazyna, şol sanda Universal Music Group toparynyň düzümindekä ýazylan sazyna bolan hukugy satdy.
Düzüjiler reýtingiň üçünji setirini amerikaly aktýor we režissýor Taýler Perrä berdiler - onuň 175 million dollary bar. Rekord eýesi Perriniň umumy baýlygynyň möçberi-de 1 milliard dollardan geçýär. Bu sanawda şeýle görkezijä ýeten ýeke-täk adam.
“South Park”-yň döredijileri Treý Parker we Mett Stoun reýtingde dördünji orny eýeledi. Bir ýylda HBO Max hyzmaty we Paramount bilen üstünlikli baglaşylan şertnamalar sebäpli 160 million dollar gazandy. Bäşinji ýer we 105 million dollar “Simpsonlar” multserialyny döredijilerki. Jeýms Bruks we Mett Grouning “Disneý” bilen baglaşan şertnamasyndan ep-esli hak aldylar.
Golliwudyň aktýory Bred Pitt hem ilkinji onluga girdi. Ol 2022-nji ýylda baýlygyny 100 million dollar artdyrdy. Bu “Plan B.” kompaniýasyndaky önümçilik işleri bilen baglanyşyklydy. Mundan başga-da, aktýor “Gülleden ýyndam”, “Wawilon” we “Ýitirilen şäher” filmlerinden 30 million dollar gazandy.
