Günorta Koreýanyň Samsung kompaniýasy 2050-nji ýyla çenli ähli smartfonlarynyň önümçiliginde gaýtadan işlenen plastigi ulanmagy maksat edinýär. Bu barada “Rýonhap” agentliginiň habarynda aýdylýar diýip, rbclife.ru belleýär.
Öndüriji ähli täze flagman Galaxy smartfonlarynda gaýtadan işlenen plastik materiallaryny ulanmagy we 2025-nji ýyla çenli gaplamada plastik ulanmakdan ýüz öwürmegi meýilleşdirýär.
“Siz kampaniýamyzyň Ýeriň daşky gurşawyna nähili täsiriniň bardygy bilen gyzyklanyp bilersiňiz, ýöne bu Samsung-yň önüm portfelini göz öňünde tutsaň diýseň uly täsirdir” – diýip, Seulda geçirilen brifingde kompaniýanyň wise-prezidenti Pak Son Sun belledi.
Agentlik Samsung kompaniýasynyň Galaxy hatarynyň flagman telefonlaryny öndürmekde eýýäm ekologiýa taýdan arassa materiallary ulanýandygy barada maglumatlary getirýär. Kompaniýa fewral aýynyň başynda täze Galaxy S23, Galaxy S23 Plus smartfonlaryny çykardy, olarda gaýtadan işlenen plastikden ýasalan 11 sany içerki we daşarky komponentler ulanyldy. Galaxy S23 Ultra modelinde bolsa şeýle komponentler 12 sany.
Mysal üçin, Galaxy S23 Ultra yzky aýnada we öňdäki korpusda taşlanan PET çüýşelerinden gaýtadan işlenen plastigi, şeýle-de gapdal düwmede, sesi sazlaýjy düwmede we SIM-kartlary saklaýjylarda gaýtadan işlenen alýuminini ulanýar.
