Ýaponiýanyň Nissan Motor Co awtoöndürijisi we Renault SA fransuz awtokonserni dünýäniň iň çalt ösýän bazarlarynyň birinde işewürligi ösdürmek boýunça tagallalaryň çäginde Hindistanda täze awtomobil modelleriniň işlenip düzülmegine 600 mln dollar maýa goýmagy göz öňünde tutýan meýilnamany yglan etdiler. Bu barada interfax.ru habar berýär.
Geçen hepde hyzmatdaşlygyň şertlerine täzeden garamak barada ylalaşan kompaniýalar hindistanly we daşary ýurtly müşderiler üçin alty sany täze awtomobiliň üstünde işlärler diýip, Nissan-yň habarynda aýdylýar.
Şol sanda kompaniýalar iki sany uly bolmadyk elektromobili öndürerler. Bu kompaniýalaryň Hindistanda ilkinji elektromobilleri bolar. Mundan başga-da, Nissan we Renault dört sany SUV klasly awtomobili öndürer.
Şeýlelikde, kompaniýalaryň Hindistanyň Çennaý şäherindäki gözlegler we işläp düzmeler bilen meşgullanýan bölümçesiniň ştaty, takmynan, 2 müň adam artar. Häzir onda 8 müňe golaý işgär bar. Kompaniýalaryň şol şäherdäki bilelikdäki kärhanasy 2010-njy ýylda daşary ýurtlara ibermeler başlaly bäri 108 döwlete 1 milliondan gowrak awtomobil eksport etdi.
