The Walt Disney kompaniýasy “Oýnawaçlaryň wakasy”, “Sowuk ýürek” we “Haýwanlar utopiýasy” multfilmleriniň dowamyny döretmegiň üstünde işleýär. Bu barada kompaniýanyň baş müdiri Robert Aýger maýadarlaryň gatnaşmagynda geçirilen telekonferensiýanyň dowamynda aýtdy diýip, TASS habar berýär.
“Men animasiýa studiýamyzyň iň meşhur franşizalarymyz bolan “Oýnawaçlaryň wakasy”, “Sowuk ýürek” we “Haýwanlar utopiýasy” multfilmleriniň dowamlarynyň üstünde işleýändigini habar bermäge şat. Ýakyn wagtda bu taslamalar barada giňişleýin gürrüň bereris” – diýip, “Deadline” neşiri Aýgeriň sözlerini getirýär.
Şeýlelikde, kompaniýa “Oýnawaçlaryň wakasynyň” bäşinji, “Sowuk ýürek” multfilminiň üçünji we “Haýwanlar utopiýasy” multfilminiň ikinji bölümini döretmegi meýilleşdirýändigini mälim etdi.
Animasion kartinalaryň öňki bölümleri prokat hitlerine we taryhda iň girdejili multfilmleriň birine öwrüldiler. Ýagny, “Sowuk ýürek II” dünýä prokatynda $1,45 mlrd, “Oýnawaçlaryň wakasy 4”, takmynan, $1,1 mlrd gazandy. Multfilmleriň ikisi-de 2019-njy ýylda çykdy. Ondan 3 ýyl öň, 2016-njy ýylda çykan “Haýwanlar utopiýasy” multfilmi iň girdejili multfilmleriň onlugyna girdi, dünýä prokatynda bolsa 1 mlrd dollardan gowrak gazandy.
