Udmurtiýanyň ýaşaýjysy Ýelena Maksimowa “Älem hanymy – 2022” halkara gözellik bäsleşiginiň esasy titulyna eýe boldy. Bu ýyl bäsleşik 30-njy ýanwardan 5-nji fewral aralygynda Sofiýada geçirildi diýip, TASS habarlar agentligi habar berýär.
“Udmurtiýanyň otuz dört ýaşly ýaşaýjysy Ýelena Maksimowa finaly 4-nji fewralda Sofiýada geçirilen “Älem hanymy – 2022” gözellik bäsleşiginde ýeňiji boldy” – diýip, bäsleşigiň metbugat gullugynda habar berilýär.
Bäsleşigiň finalyna Hytaý, Tailand, Filippinler, Ýaponiýa, Hindistan, Belarus, Ukraina, Germaniýa, Ispaniýa, ABŞ ýaly dürli ýurtlardan 120 zenan çykdy. 2007-nji ýyldan bäri geçirilýän bäsleşigiň taryhynda ilkinji gezek birinji orny Russiýanyň wekili eýeledi.
Ýelena Maksimowa Udmurt Respublikasynyň Gyýa obasynda dünýä indi. Häzir ol Ižewskde dil merkezleriniň ulgamyna ýolbaşçylyk edýär. Onuň iki çagasy bar we ol syýahat etmegi gowy görýär. Ol eýýäm 34 ýurtda syýahatda bolup gördi. 2021-nji ýylda Maksimowa “Ikinji Russiýa – Älem wise-hanymy” boldy, bu hem oňa bäsleşigiň halkara tapgyrynda ýurda wekilçilik etmäge mümkinçilik berdi.
“Bäsleşikde bäsdeşlik örän güýçli boldy – gatnaşyjylaryň sany rekord goýýar we olaryň ählisi-de ýeňiş gazanmaga mynasyp. Meniň üçin şeýle bäsleşikde ýurda wekilçilik etmek uly hormat we men ýeňiş bilen gaýdyp barýandygyma örän begenýärin. Aýratynam, Russiýa ýeňiş getiren ilkinji gatnaşyjy bolmak hasam ýakymly” – diýip, metbugat gullugy Maksimowanyň sözlerini getirýär.
