2023-nji maliýe ýylynyň birinji çärýeginde Apple kompaniýasy arassa girdejisini 13,4% we girdejisini 5,5% azaltdy. Görkezijileriň ikisi-de hünärmenleriň çaklamalaryna laýyk gelmedi diýip, Interfax.ru habar berýär.
Kompaniýanyň metbugat relizinde habar berlişi ýaly, 31-nji dekabrda tamamlanan çärýegiň jemi boýunça arassa girdeji geçen ýylyň degişli döwründäki 34,63 mlrd dollar ýa-da paý üçin 2,1 dollar bilen deňeşdirilende 29,998 mlrd dollar ýa-da paý üçin 1,88 dollar boldy.
Girdeji bir ýyl ozalky 123,945 mlrd dollara garşy 117,154 mlrd dollara çenli azaldy. FactSet tarapyndan sorag edilen analitikler kompaniýanyň düşewündiniň 121,4 mlrd dollar girdejide paý üçin 1,94 dollar derejesinde bolmagyny çaklapdylar.
Geçen çärýek iPhone satuwyndan gelen girdeji geçen ýylky 71,63 mlrd dollardan 65,76 mlrd dollara çenli azaldy.
Mac kompýuterleriniň satuwyndan gelen girdeji 10,85 mlrd dollardan 7,74 mlrd dollara çenli, dakylýan gurluşlaryň, aksessuarlaryň we öý gurluşlarynyň satuwyndan gelen girdeji bolsa 14,7 mlrd dollardan 13,48 mlrd dollara çenli azaldy. Şol bir wagtyň özünde iPad satuwyndan alnan girdeji 7,25 mlrd dollar bilen deňeşdirilende 9,4 mlrd dollara çenli ýokarlandy.
App Store, Apple Music, Apple Pay we iCloud serwisleriniň girdejisi bir ýyl ozalky 19,52 mlrd dollardan 20,77 mlrd dollara çenli ýokarlandy.
