Jaafar Jekson režissýor Antuan Fukuanyň “Maýkl” atly täze biografiki filminde öz daýysy Maýkl Jeksonyň keşbini ýerine ýetirer. Bu barada “Variety” neşirine salgylanyp, rbclife.ru habar berýär.
Jaafar pop-sazynyň şasynyň uly dogany we “The Jackson 5” toparynyň agzasy Jermeýn Jeksonyň 26 ýaşly ogly bolup, 12 ýaşyndan bäri aýdym-saz we tans bilen meşgullanýar. Ol hatda 2019-njy ýylyň tomsunda özüniň “Got me Singing” atly ilkinji aýdymyny hem çykardy.
Film barada aýdylanda, ol pop-sazynyň şasynyň yzynda galdyran mirasyna bagyşlanar. Şourannerler ýerine ýetirijiniň durmuşynyň ähli ugurlary barada gürrüň bererler, şol sanda onuň “ähli döwürleriň iň beýik artisti bolmagyna sebäp bolan iň ajaýyp çykyşlaryny” görkezerler.
Prodýuser Grem King surata düşüriji toparyň laýyk dalaşgäri tapýança dünýäniň dürli künjeginden aktýorlary gözländigini aýtdy. “Men Jaafara iki ýyl mundan ozal duşdum we şonda onuň Maýklyň energetikasyny we şahsyýetini nädereje özünde jemländigine haýran galdym. Bu şeýle bir güýçli zat welin, dünýäniň dürli ýerinden aktýorlar gözlenenden soň, onuň bu keşbi ýerine ýetirip biljek ýeke-täk adamdygy belli boldy” – diýip, kinematografçy aýtdy.
Filmiň surata düşürilişi 2023-nji ýylda başlar, ýöne anyk senesi heniz belli däl. Önümçilik bilen Lionsgate mediakompaniýasy meşgullanar, ssenariýany Jon Logan (“Gladiator”, “Iň soňky samuraý”) ýazar.
