Italiýaly dizaýner Sabato de Sarno Gucci-niň täze döredijilik müdiri wezipesini eýeledi. Bu barada brendiň eýesi bolan Kering moda konglomeratynyň wekilleri resmi metbugat relizinde habar berdiler. Bu wezipede de Sarno geçen ýyl moda öýüni terk eden Alessandro Mikeleniň ornuny çalyşdy diýip, forbes.kz belleýär.
Döredijilik müdiriniň wezipesinde Sabato de Sarno brendiň zenanlar we erkekler kolleksiýalaryna jogap berer hem-de deri önümleri, aksessuarlar we interýer predmetleri bilen işleşer. Ol Gucci üçin ilkinji kolleksiýasyny sentýabr aýynda Milanda geçiriljek Zenanlar moda hepdeliginde görkezer.
Sabato de Sarno Neapolda doguldy. Ol Italiýanyň iki dizaýn mekdebini tamamlady: Instituto Carlo Secoli we Instituto Europeo di Design. Ol karýerasyna 2005-nji ýylda Prada brendinde başlady, soňra Dolce & Gabbana moda öýüne geçdi, 2009-njy ýylda bolsa Valentino moda öýüne goşuldy. Ol ýerde baş dizaýner Pýerpaolo Piççoli bilen işledi we wagtyň geçmegi bilen erkekler we aýallar liniýalarynyň dizaýn müdiri wezipesini eýeledi.
Modelýer Alessandro Mikele Gucci-niň döredijilik müdiri wezipesinde 2015-nji ýylyň ýanwar aýyndan bäri işläp, 2022-nji ýylyň noýabr aýynda bu wezipäni terk etdi.
