Fransiýanyň Renault awtomobil gurluşyk kompaniýasy şu aý ýaponiýaly hyzmatdaşy Nissan-daky paýyny 43%-den 15%-e çenli azaldyp biler. Bu barada “Yomiuri” gazeti habar berdi diýip, TASS belleýär.
Onuň maglumatlaryna görä, häzirki wagtda taraplar ahyrky gepleşikleri geçirýärler, ýöne neşir Renault-yň paýyny 15%-e çenli azaltmak baradaky esasy ylalaşygyň gazanylandygyny ýazýar. Şol bir wagtyň özünde Ýaponiýanyň awtomobil konserni Renault-yň ýakyn wagtda Ýewropada işe girizjek elektromobil önümçiligi boýunça täze kompaniýasyna maýa goýmagy meýilleşdirýär diýip, “Yomiuri” belleýär.
Häzir Renault ýaponiýaly hyzmatdaşynyň paýnamalarynyň 43%-ine eýe. Emma Nissan-yň bolsa fransiýaly korporasiýada 15% paýy bar we şol sebäpli onuň çözgütlerine täsir etmäge hukugy ýok. Ýapon tarapy bu ýagdaýy deňsizlik diýip hasaplady we bu ikitaraplaýyn birleşigiň şertlerine gaýtadan seretmek baradaky dowamly gepleşikleriň başlanmagyna sebäp boldy.
