Dubaýyň häkimiýetleri şäherde 3D printerinde çap edilen dünýädäki ilkinji metjidi gurmak meýilnamasyny yglan etdiler. Muny “The National” gazetine salgylanyp, TASS habar berýär.
“3D çap tehnologiýasynyň ulanylmagy gurluşyk materiallarynyň çykdajylaryny azaltmaga mümkinçilik berer. Mundan başga-da, bu usul tebigata zyýan ýetirmeýär we biziň parasatly ýolbaşçylygymyzyň görüş ukybyny şöhlelendirýär” – diýip, neşir Emirligiň Yslam we haýyr-sahawat meseleleri boýunça departamentiniň baş müdiri Hamad aş-Şaýbaniniň sözlerini getirýär.
Şeýle-de bolsa, taslamanyň üstünde işleýän inženerler synag häsiýeti sebäpli gurluşygyň metjidi adaty usul bilen guranyňdan 30% gymmata düşjekdigini bellediler.
Saýlanan tehnologiýa çalt gataýan gurluşyk materialynyň gatlaklaryny kompýuter belliklerine laýyklykda goýulmagyny göz öňünde tutýar. Meýdany 2 müň inedördül metr bolan metjidiň gurluşygyna 2023-nji ýylyň oktýabr aýynda başlamak meýilleşdirilýär. 3D çap ediş üçin dört aý, binanyň dileg edýänler üçin ähli zerur zatlar bilen üpjün edilmegine bolsa ýene bir ýyl gerek bolar.
Taslama 3D çap tehnologiýasynyň ösdürilmegini we 2023-nji ýyla çenli Emirligiň paýtagtyny bu ugurda dünýä liderine öwürmegi göz öňünde tutýan strategiýanyň çäklerinde durmuşa geçirilýär.
