Hüjümçi Garet Beýl özüniň sosial ulgamlardaky sahypasynda 33 ýaşynda professional karýerasyny tamamlaýandygyny habar berdi. Muny championat.com ýetirýär.
“Köp pikirlenenimden soň men klub we halkara derejesindäki karýeramy tamamlaýandygymy mälim edýärin. Maňa arzuwymy durmuşa geçirmek we gowy görýän sportum bilen meşgullanmak nesip etdi. Indi men durmuşymyň täze bir sahypasyna tarap hereket edýärin. Täze başdan geçirmeler üçin üýtgeşmeleriň we mümkinçilikleriň wagty geldi” – diýip, Beýl ýazdy.
Beýliň karýerasyndaky soňky klub “Los-Anjeles” boldy. Öň, futbolçy “Sautgempton”, “Tottenhem Hotspur” we Madridiň “Realy” toparlarynda oýnady. Ispaniýanyň klubunyň düzüminde Beýl bäş gezek UEFA-nyň Çempionlar ligasynyň ýeňijisi boldy.
2022-nji ýylda geçirilen dünýä çempionatynda ol Uelsiň milli ýygyndysynyň düzüminde çykyş etdi. Uelsliler B toparçada soňky orny eýeläp, ýaryşyň indiki tapgyryna çykyp bilmediler.
