Futbol boýunça dünýäniň üç gezek çempiony Peläniň hormatyna Braziliýanyň esasy stadiony «Marakana» barýan esasy ýollaryň birine onuň adyny dakylar. Bu karar şäher häkimligi tarapyndan kabul edildi.
Bu barada Rio-de-Žaneýro şäheriniň häkimi Eduardu Paýes şahsy twitter-akkauntynda mälim etdi. Ol: ««Marakananyň» töwereginden geçýän Günbatar radial şaýoly Pele şaýoly diýlip atlandyrylar. Bu baradaky perman ertir çap ediler» — diýip ýazdy.
«Futbol şasy» bilen hoşlaşyk däbiniň sişenbe güni tamamlanandygyny ýatladýarys. Matam däbi bir gije-gündizläp Peläniň karýerasynda oýunlarynyň köp bölegini oýnan ýeri bolan «Santos» futbol klubunyň öý stadionynda dowam etdi.
Sişenbe güni ýas kerweni şäheriň içi bilen geçirildi, şondan soň ady rowaýata öwrülen futbolçy jaýlandy. Pele 29-njy dekabrda 82 ýaşynyň içinde uzaga çeken keselden soň dünýesini täzeledi.
