Luis Inasiu Lula da Silwa üçünji gezek Braziliýanyň prezidenti hökmünde işe başlady. Syýasatçy owal 2003-nji ýyldan 2011-nji ýyla çenli ýurda ýolbaşçylyk edipdi. Bu gezek ol saýlawda Žair Bolsonarudan üstün çykdy. Bolsonaru kasam kabul ediş dabarasyna gatnaşmady: ol geçen anna güni ýurtdan gitdi.
Milli Kongresiň binasyna gitmezden ozal, Lula da Silwa we täze wise-prezident Jeraldo Alkmin ýurduň paýtagtynyň köçelerinden üsti açyk awtoulagda geçdiler. Olary müňlerçe tarapdarlary tolgunmak bilen garşy aldylar.
Lula da Silwa Braziliýanyň halky bilen bilelikde ýurdy dikeltmegi, 33 million raýaty açlykdan we döwletiň 100 million ilatyny garyplykdan halas etmegi wada berdi.
