Hüjümçi Lionel Messi Katarda geçirilen futbol boýunça dünýä çempionatynyň finalynda Argentinanyň milli topary ýeňiş gazanandan soň milli ýygyndydaky karýerasyny tamamlamajakdygyny aýtdy.
Ýekşenbe güni Argentinanyň milli ýygyndysy Doha şäheriniň etegindäki "Lusail Aýkonik" stadionynda penalti arkaly 4:2 hasabynda Fransiýanyň toparyny utdy (esasy we goşmaça wagtdan soň hasap 3:3) we üçünji gezek dünýä çempionatynda ýeňiji boldy. Messi üçin bu ýeňiş ilkinji boldy.
"Men şunuň bilen karýeramy tamamlamak isläpdim, mende isläre başga zat ýok. Amerikanyň kubogy, dünýä çempionaty - bular karýeramyň ahyrynda diýen ýaly hasyl boldy, ýöne men futboly we edýän zadymy halaýaryn. Maňa milli ýygyndyda bolmak ýaraýar, men dünýä çempiony hökmünde mundan beýläk hem oýnamak isleýärin" - diýip, TyC Sports Messiniň sözlerini getirýär.
Şol bir wagtyň özünde Fransiýanyň "Pari Sen-Žermen" toparynyň prezidenti Nasser Al-Helaifi Argentinanyň milli ýygyndysynyň kapitany Lionel Messi bilen onuň topardaky geljegi barada dünýä çempionatyndan soň gürleşmek kararyna gelnendigini aýtdy.
"Mbappe bilen Messi "PSŽ-de" galarmy? Elbetde, bularyň ikisi-de dünýä çempionatynyň iň gowy bombardirleri we oýunçylary. Men Leo barada belli bir zat aýtmak islemeýärin, biz onuň bilen karýerasy barada dünýä çempionatyndan soň gürleşmegi ylalaşypdyk" - diýip, RMC Sport Al-Helaifiniň sözlerini getirýär.
