Argentinanyň milli ýygyndysynyň kapitany Lionel Messi Katarda geçirilen dünýä çempionatynyň iň gowy oýunçysy diýlip ykrar edildi we FIFA-nyň "Altyn topunyň" eýesi boldy.
Argentinanyň milli ýygyndysy dünýä çempionatynyň finalynda fransiýalylary utdy. Duşuşygyň esasy wagty 2:2 hasabynda tamamlandy, oýnuň goşmaça wagtynda hem toparlar gol geçirdi. Penalti tapgyrynda Argentinanyň ýygyndysy has güýçli boldy - 4:2. Messi oýunda iki gol girizdi hem-de 11 metrlik urgyny ýerine ýetirdi.
Messi Katarda geçirilen dünýä çempionatyndaky ýedi golunyň dördüsini penaltiden saldy. Ol bir dünýä çempionatynyň ähli tapgyrynda gol salan ilkinji oýunçy boldy. Toparlaýyn tapgyrda Messi Saud Arabystanynyň we Meksikanyň, 1/8 finalda awstraliýalylaryň, 1/4 finalda niderlandlaryň, 1/2 finalda horwatiýalylaryň derwezesine gol girizdi. Finalda meýdança çykmak bilen Messi dünýä çempionatlarynda oýun sany boýunça täze rekord (26) goýup, Germaniýanyň milli ýygyndysynyň düzüminde dünýä çempiony Lotar Matteusyň üstünliginden (25) öňe geçdi.
Katardaky dünýä çempionaty 35 ýaşly Messi üçin karýerasynda bäşinji boldy. Öň Messi 2014-nji ýylyň ýaryşynda dünýä çempionatynyň iň gowy oýunçysy diýlip ykrar edilipdi.
