Şwesiýanyň Şellefteo şäheri saglyk ýagdaýy çäkli adamlar üçin iň amatly şäher bolup, Ýewropa Bileleşiginiň Access City Award ýyllyk baýragyna mynasyp boldy. Bu barada euro-pulse.ru habar berýär.
Şeýle adamlar üçin şäheriň artykmaçlyklaryny belläp geçsek, bu şäherde gözi pes görýänler üçin ýol işleri we şäherde bolup biljek beýleki päsgelçilikler barada maglumat berýän SMS hyzmaty işleýär. Şäheriň merkezi seýilgähi we golaýdaky kenar gözi görmeýän we pes görýän adamlar üçin taktil görkezijiler we kartalar, şeýle-de oturylýan ýerler we maýyplar arabasy üçin lift bilen üpjün edilendir.
Mundan başga-da, Şellefteo intellektual mümkinçilikleri çäkli bolan ýaş adamlar üçin ýörite okuwlary guraýar. Bu okuwlarda olar döwrebap tehnologiýalar we iş usullary bilen tanşyp bilýärler. Bu hem olara garaşsyz uly adamlaryň durmuşynda ýaşamaga kömek edýär.
Ispaniýanyň Kordowa şäheri we Sloweniýanyň paýtagty Lýublýana ikinji we üçünji orunlary eýelediler. Geçen gezek Access City Award baýragynyň ýeňijisi Lýuksemburg boldy.
