Günorta Koreýanyň parlamenti ýaşy hasaplamagyň ýurtda adat bolan ulgamyny ýatyrmak hakynda karar kabul etdi. Ulgam 2023-nji ýylyň iýunyndan başlap resmi resminamalarda ýatyrylýar we ähli instansiýalar halkara ülňüsindäki ulgama geçerler diýip, "Renhap" ýazýar.
Şu wagta çenli Koreýa Respublikasynda ýaşy hasaplamagyň üç ulgamy ulanylýardy. "Koreý däbine" görä, çaga doglanda ol bir ýaşynda diýip hasaplanýar. Şonda kamary ýyl hasaby boýunça her täze ýylyň birinji güni oňa ýene bir ýaş goşulýar. Ýagny, eger çaga 2022-nji ýylyň 8-nji dekabrynda doglan bolsa, ol bir ýaşynda diýip hasaplanýar, täze kamary ýylynyň birinji güni bolsa ol eýýäm iki ýaşynda bolýar.
Ikinji bir ulanylýan däp, ol hem çaga doglanda ol nol ýaşynda bolýar, ýöne täze ýylyň birinji gününden oňa her ýyl bir ýaş goşulýar. Bu ulgam adatça çilim çekmäge we alkogolly içgileri içmäge rugsat berilýän ýaşa ýetilende ulanylýar.
Şol bir wagtda ýurtda halkara ulgam hem ulanylýar, çaga doglanda onuň ýaşy nol bolup, her doglan gününde oňa bir ýaş goşulýar.
Täze kanun iýun aýyndan başlap, ýurtdaky resmi resminama dolanyşygynda diňe halkara ulgamyň ulanylmagyny göz öňünde tutýar, şol sebäpli Koreýanyň "doglanda bir ýaşly" raýatlary bir ýaş kiçelerler.
Häzirki ýurt başyndaky "Halk häkimiýeti partiýasynyň" wekili Ýu San Bom bu meselä täzeden seredilmegi gerekmejek sosial-ykdysady çykdajylary kemeltmäge gönükdirilendir, sebäbi hasaplamak ulgamyndaky bulaşyklyk sebäpli köp sanly hukuk we jemgyýetçilik jedelleri ýüz çykýar diýip mälim edýär.
