9-njy dekabrda Prezident Serdar Berdimuhamedow Birleşen Arap Emirlikleriniň senagat we öňdebaryjy tehnologiýalar boýunça ministri Sultan Al Jaberiň ýolbaşçylygynda ýurdumyza sapar bilen gelen wekiliýeti kabul etdi.
Serdar Berdimuhamedow ýakynda Birleşen Arap Emirliklerine bolan resmi saparyny ýatlap, onuň barşynda ýokary derejedäki gepleşikleriň geçirilendigini, möhüm ylalaşyklaryň gazanylandygyny aýtdy. Şunuň bilen baglylykda, şu gezekki gepleşikleriň, şeýle hem öňde boljak beýleki, şol sanda ykdysadyýetiň esasy pudaklarynyň ýolbaşçylary bilen geçiriljek duşuşyklaryň köpugurly hyzmatdaşlygy ösdürmek üçin giň mümkinçilikleri döretjekdigine ynam bildirildi.
Serdar Berdimuhamedow ykdysady hyzmatdaşlyk barada aýtmak bilen, BAE-niň biziň ýurdumyzyň esasy söwda-ykdysady hyzmatdaşlarynyň biri bolup durýandygyny kanagatlanma bilen nygtady. Döwlet Baştutany ýangyç-energetika toplumyny, himiýa senagatyny, ulag-kommunikasiýa hem-de maliýe-bank ulgamlaryny netijeli hyzmatdaşlygyň esasy ugurlarynyň hatarynda görkezmek bilen, şulardan ugur alyp, beýleki birnäçe ugurlar boýunça hem hyzmatdaşlygyň işjeňleşdirilmegini zerur hasap edýändigini belledi.
Döwlet Baştutany BAE-däki hyzmatdaşlaryň gyzyklanma bildirýän ähli ulgamlarda gatnaşyklary ösdürmek boýunça anyk tekliplerine türkmen tarapynyň seretmäge taýýardygyny tassyklap, döwletara gatnaşyklaryň iki dostlukly halkyň bähbidine mundan beýläk-de ösdüriljekdigine hem-de pugtalandyryljakdygyna ynam bildirdi.
