Ýaponiýanyň ispace kompaniýasynyň Hakuto-R awtomatik kosmiki gämisini Aýa 7-nji dekabrda uçurmak meýilleşdirildi diýip, ýöriteleşdirilen Next Spaceflight neşiri habar berýär.
Uçurylyşyň wagty SpaceX kompaniýasynyň Falcon 9 raketa göterijisindäki tehniki meseleler bilen bagly öňem iki gezek üýtgedilipdi.
Soňky maglumatlara görä, goýberilişi 7-nji dekabrda Florida ştatyndaky kosmiki güýçleriň bazasynda 40-njy SLC bat alyş toplumyndan ABŞ-nyň Gündogar kenarýaka wagty bilen sagat 06:04-de (16:04 aşg.) geçirmek meýilleşdirilýär.
Öňde duran missiýa dolulygyna hususy hasaplanýar. Hakuto-R Aýa üstünlikli gonan taryhda ilkinji hususy kosmiki apparat bolar. Ýaponiýanyň ispace kompaniýasy gonuş gurluşlaryny döretmek üçin robotlaşdyrylan kosmiki apparatlaryň tehnologiýasyny işläp taýýarlaýar.
Bir tonnalyk gonuş modulyny 2023-nji ýylyň aprelinde Ýeriň tebigy hemrasynyň görünýän tarapynda Atlas kraterinde gondurmak meýilleşdirilýär. Onuň gapdaly ylmy abzallar bilen enjamlaşdyrylyp , ol stasionar zond hökmünde barlag işlerini ýerine ýetirer.
Ýaponiýanyň takmynan 2 x 2,5 metr ölçegli gonuş apparaty bilen birlikde Aýa Birleşen Arap Emirliklerinde döredilen agramy 10 kg töweregi bolan Rashid lunohody hem uçar.
Mohammed Bin Raşidiň (BAE) Kosmiki merkezinde gurlan mikrorower ýokary razreşeniýeli iki sany kamera, mikroskop, teplowizor we Lengmýuryň zondy bilen enjamlaşdyrylan.
Rashid lunohody Ýer hasaby bilen 14 günläp dowam etjek missiýasy wagtynda Aý üstüni surata almaly we bir topar barlaglary geçirmeli.
