2023-nji ýylda Wýetnamda ýurduň 100 millionynjy raýatynyň dünýä inmegine garaşylýar. Bu barada ýerli KHBS habar berdi diýip, russian.news.cn belleýär.
Häzirki wagtda Wýetnamyň ilaty 99 mln adamdan geçýär, bu hem ony ilat sany boýunça dünýäde 15-nji, Aziýa sebitinde 8-nji we Günorta-Gündogar Aziýada üçünji ýurt edýär diýip, “Tuoi Tre” gazeti habar berýär.
Wýetnamda tas 25 mln aýal çaga dogurmak ýaşyndadyr /15-den 49 ýaş aralygy/. 2030-njy ýyla çenli bu mukdaryň 26 milliona ýetmegine garaşylýar.
Bütindünýä bankynyň maglumatlaryna görä, Wýetnam 2015-nji ýylda garraýan jemgyýet boldy we 2035-nji ýyla çenli garry jemgyýeti bolan ýurda öwrüler. Bu hem ony dünýäniň iň çalt garraýan döwletleriniň birine öwrer.
