Ertir, 20-nji noýabrda Katarda futbol boýunça 22-nji dünýä çempionaty badalga alýar. Çempionatyň açylyş duşuşygynda Katar bilen Ekwador duşuşar. Baş baýrak ugrunda jemi 32 sany milli ýygyndy ýaryşar. Bu Katardaky dünýä çempionatynyň aýratynlyklarynyň biri, çünki eýýäm 2026-njy ýylda ABŞ-da, Kanadada we Meksikada geçiriljek dünýä çempionatyna 48 sany milli ýygyndy gatnaşar.
Toparlaýyn tapgyrda 32 sany milli ýygyndy dört dörtden 8 topara bölündi. Garşydaşlar üç oýundan oýnarlar. Toparlaryň ýeňijileri we ikinji orny eýelänler pleý-off tapgyryna çykarlar.
Katarda geçjek futbol boýunça dünýä çempionaty özüniň täsinlikleri bilen haýran galdyrýar. «Ýerden üçege çenli ähli zat boýdan-başa, hatda oýnaljak top hem iň kämil «akylly» tehnologiýalar esasynda taýýarlanyldy. Oýun we türgenleşik meýdançalary, olara eltýän ýollar we ýanýodalar, janköýerleriň ýaşajak, gezjek, görjek ýerleriniň her sere ýeri diýen ýaly sungat derejesinde kämil gurnaldy.
Ähli infrastruktura döwrebaplygy, daşky bezegi hem-de gurluşy babatda täsin oýlap tapyjylykly pikirlere baýdyr. Bina edilen her bir zada juda döredijilikli çemeleşildi. Tehnikanyň ösen mümkinçiliklerini doly derejede diýen ýaly peýdalanyljak Katardaky bu ýaryş futbol boýunça dünýä çempionatynyň taryhynda iň naýbaşy we döwrebap çempionat bolar» diýip, Kataryň Al-Jazeera saýty habar berýär.
Saýtda ýazylmagyna görä, oýun meýdançalarynyň degre-daşyny dolduryp duran kameralar eminleriň oýna adalatly baha bermegini hem üpjün eder. Mahlasy, Katar döwletinde futbol boýunça geçiriljek dünýä çempionaty diňe bir gyzykly oýunlary bilen däl, eýsem adam aňynyň döredijilikli gözellikleri, täsinlikleri bilenem tanyşmaga mümkinçilik berer.
