Janni Infantino Halkara Futbol federasiýasynyň (FIFA) prezident wezipesine ýeke-täk dalaşgär boldy. Bu barada FIFA-nyň metbugat gullugy habar berdi diýip, TASS belleýär.
Saýlawlar üçin arza tabşyrmagyň möhleti 17-nji noýabrda tamamlandy. Saýlawlar 2023-nji ýylyň 16-njy martynda Kigali şäherinde (Ruanda) boljak guramanyň nobatdaky kongresinde geçiriler. Infantino FIFA-nyň geljekki prezident saýlawlaryna dalaşgärligini hödürleýändigini 31-nji martda habar berdi.
Infantino 2016-njy ýylyň fewral aýynda nobatdan daşary kongresde guramanyň prezidenti saýlandy. Bu wezipede ol guramadaky köp sanly korrupsiýa dawalaryndan soň işden çekilen şweýsariýaly Ýozef Blatteriň ornuny çalyşdy. 2019-njy ýylyň iýun aýynda Infantino Pariždäki kongresde FIFA-nyň prezident wezipesine gaýtadan saýlandy. Şonda saýlawlar alternatiwasyz esasda geçirildi.
Infantino 52 ýaşynda. 2000-nji ýyldan 2016-njy ýyl aralygynda Ýewropanyň Futbol assosiasiýalarynyň birleşiginde (UEFA) işledi. Bu guramadaky işiniň soňky ýedi ýylynda Infantino UEFA-nyň Baş sekretary wezipesini eýeledi.
