“Formula-1” 2023-nji ýylyň mart aýynda Madridde geçiriljek ilkinji resmi sergisine taýýarlyk görýär. Ekspozisiýa 4 aý töweregi açyk bolup, doly derejede çempionatyň taryhyna, onuň legendalaryna we rekordlaryna, ähli toparlara we dünýäniň iň meşhur ýaryşynyň beýleki taraplaryna bagyşlanar diýip, c-sport.info habar berýär.
Guramaçylar çäräniň saýtyny işe girizdiler we onda Madridde geçiriljek sergi üçin petekleriň deslapky satuwynyň 2022-nji ýylyň 29-njy noýabrynda başlajakdygy aýdylýar. Olar myhmanlara taryhda ilkinji gezek görkeziljek birnäçe eksponatyň garaşýandygyny belleýärler.
“Formula-1-iň geçmişini, şu gününi we geljegini başdan geçiriň!” – diýlip, portalda aýdylýar.
“Formula-1-iň” hyzmatdaşy bolup sergi işine ýöriteleşýän Round Room Live kompaniýasy çykyş etdi. Olar sergini geçirmek üçin 6 sany aýratyn ýörite enjamlaşdyrylan zaly gurnarlar, bezegiň üstünde bolsa dünýä belli suratkeşler we dizaýnerler işlär.
Şeýle-de, serginiň myhmanlaryna “Formula-1-iň” dünýäsine wirtual syýahat etmek mümkinçiligi hödürlener.
