15-nji noýabrda Ankarada Naim Suleýmanoglunyň hatyrasyna agyr atletika boýunça Halkara ýaryş başlanýar. Bu ýaryşa ýurdumyzyň agyr atletika boýunça ussat türgenleri hem gatnaşar.
Türkiýäniň agyr atletika federasiýasynyň habar bermegine görä, ýaryş Pursaklar sport toplumynda guralyp, üç gün dowam eder. Onuň açylyş dabarasy ýerli wagt bilen sagat 14:00-a meýilleşdirilýär. Bu ýaryşa jemi 16 döwletden 72 türgen gatnaşar.
Ýaryşyň guraýjysy bolup Türkiýäniň agyr atletika federasiýasy bilen Pursaklar etrabynyň häkimligi bilelikde çykyş edýär. Türkiýeli we türkmenistanly türgenlerden başga-da, ýaryşda Fransiýa, Kosowa, Özbegistan, Daniýa, Belgiýa, Albaniýa, Azerbaýjan, GFR, Sloweniýa, Ispaniýa, Bosniýa we Gersegowina, Niderlandlar, Eýran we Saud Arabystany ýaly ýurtlardan hem agyr atletikaçylar çykyş eder.
Belläp geçsek, ençeme gezek dünýä, Ýewropa we Olimpiýa oýunlarynyň çempiony bolan Naim Suleýmanoglu agyr atletikanyň legendasy hasaplanylýar. Türkiýeli türgen 46 dünýä rekordyny goýdy, ol agyr atletika boýunça üç gezek Olimpiýa çempiony, Ýewropa çempiony, ýedi gezek dünýä çempionydyr.
Türgen 2017-nji ýylyň 18-nji noýabrynda 50 ýaşynda aradan çykdy.
