ByteDance hytaý kompaniýasyna degişli bolan TikTok sosial ulgamy 2022-nji ýyl üçin mahabat girdejileri baradaky çaklamasyny, takmynan, 2 mlrd dollar peseltdi. Bu barada Bloomberg agentligi habar berýär diýip, forbes.kz belleýär.
Agentligiň maglumatlaryna görä, TikTok-yň baş ýerine ýetiriji müdiri Şou Szy Çu sentýabr aýynyň ahyrynda geçirilen ýygnakda işgärlere programmanyň 2022-nji ýyl üçin mahabat girdejileri boýunça çaklamasyny 12 mlrd dollardan 10 mlrd dollara çenli peseldendigini habar berdi.
Muny ulgamyň hem mahabat boýunça, hem e-commerce sektorynda satuw meýilnamasynyň ýerine ýetirilmändigi bilen baglanyşdyrýarlar, sebäbi bular platformanyň esasy girdeji çeşmeleri hasaplanylýar. Käbir işgärler bolsa TikTok-yň ýolbaşçylygynyň beýleki ugurlarda, mysal üçin, kiçi wezipelerdäki işgärleriň zähmet hakyny ýokarlandyrmak, uly korporatiw çäreleri geçirmek bilen has köp pul harç edendigini habar berýärler.
TikTok-yň ýolbaşçylygy bu maglumata teswir bermekden ýüz öwürdi. Ulgamyň garaşylýan girdejisiniň azalmagy tutuş dünýä boýunça marketing çykdajylarynyň hem azalmagyny görkezýär, sebäbi kompaniýalaram, sarp edijilerem global ykdysady pese gaçyşa taýýarlanýar.
Alphabet, Amazon, Meta we Microsoft hem çaklamalardan pes bolan netijeler barada habar berdiler we mahabat girdejileri baradaky çaklamalaryny ýüzlerçe million ýa-da milliardlarça dollar peseltdiler.
