Ýaponiýanyň Honda Motor Co ulag serişdelerini öndürijisi 2023-nji maliýe ýylynyň ikinji çärýeginde arassa girdejisini 14% ýokarlandyrdy, ýöne görkeziji analitikleriň çaklaýşy ýaly bolmady diýip, interfax.ru habar berýär.
Kompaniýanyň metbugat relizinde habar berlişi ýaly, iýul – sentýabr aýlarynda arassa girdeji geçen ýylyň degişli döwründäki 166,7 mlrd ýena bilen deňeşdirilende, 189,295 mlrd ýena ($1,3 mlrd) boldy. Analitikler görkezijiniň 205,49 mlrd ýena ýetmegine garaşypdylar.
Geçen çärýek girdeji ýyllyk aňlatmasynda 25% ýokarlanyp, 4,256 trln ýena ýetdi. Şol bir wagtyň özünde, görkeziji analitikleriň 4,122 trln ýena derejesinde boljakdygy baradaky çaklamalaryndan ýokary boldy.
Kompaniýanyň operasion girdejisi bir ýyl ozalky 198,9 mlrd ýena bilen deňeşdirilende, 231,2 mlrd ýena çenli ýokarlandy.
Iýul – sentýabr aýlarynda awtoulag satuwy bir ýyl ozalky 917 müňden 970 müňe çenli ýokarlandy, motosikl satuwy 4,29 mln birlikden 4,95 mln birlige ýetdi.
Honda şu maliýe ýylynda awtomobil satuwy baradaky çaklamasyny 4,2 mln birlikden 4,1 mln birlige çenli peseltdi. Şeýle-de, kompaniýa motosikl satuwy baradaky ýyllyk çaklamasyna gaýtadan seretdi we indi öň garaşylan 18,56 milliona garşy 18,43 mln bolmagyna garaşýar.
Ýylyň başyndan bäri kompaniýanyň bazar bahasy 6,1% ýokarlandy we häzir, takmynan, 5,86 trln ýena barabar.
