1-nji noýabrda günüň ikinji ýarymynda Gurbanguly Berdimuhamedow Russiýa Federasiýasynyň Federal Ýygnagynyň Federasiýa Geňeşiniň Başlygy Walentina Matwiýenko bilen duşuşygynyň barşynda taraplar ýadygärlik sowgatlaryny alyşdylar.
Gurbanguly Berdimuhamedow Walentina Matwiýenka türkmen zenanlarynyň däp bolan şaý-sepleriniň biri bolan tumary sowgat berdi. Bezegden başga-da, tumar gözden-dilden goramak wezipesini hem ýerine ýetirýär. Ol tumary dakynanlara rowaçlyk getirýär. Bezegiň bu görnüşi türkmen zergärleri tarapyndan altyn çaýylan kümüşden taýýarlanylýar hem-de hakyk we pöwrize daşy bilen bezelýär.
Russiýa Federasiýasynyň Parlamentiniň ýokarky palatasynyň ýolbaşçysy ajaýyp sowgat üçin hoşallyk bildirdi.
