Prezident Serdar Berdimuhamedow we Milli Geňeşiň Halk Maslahatynyň Başlygy Gurbanguly Berdimuhamedow Koreýa Respublikasynyň Prezidenti Ýun Sok Ýola ýurduň Seul şäherindäki pajygaly basa-baslyk netijesinde, köp sanly adam pidalaryna hem-de şikes ýetmelerine getiren hadysa zerarly çuňňur gynanç bildirdiler.
Döwlet Baştutany we Milli Geňeşiň Halk Maslahatynyň Başlygy şu agyr pursatda gurban bolanlaryň maşgalalaryna, dogan-garyndaşlaryna hem-de ýakynlaryna ýürekden gynanjyny, medet beriji sözlerini ýetirdiler, ejir çekenlere bolsa tiz wagtda sagalmaklary baradaky dileglerini beýan etdiler.
Ýeri gelende bellesek, 29-njy oktýabrda Koreýa Respublikasynyň Seul şäheriniň Ithewon etrabynda Hellowin baýramynyň şanyna guralan oturylyşyklardan soňra, pajygaly basa-baslyk emele gelip, onuň netijesinde aradan çykan adamlaryň sany 154-e ýetdi. Şolaryň 26-sy daşary ýurtly raýatlardyr. Bu pajygaly ýagdaý zerarly, Prezident Ýun Sok Ýol ýurtda milli matam çäresini yglan etdi.
