Superkompýuter 2022-nji ýylda Katarda geçiriljek futbol boýunça dünýä çempionatynda Argentinanyň milli ýygyndysynyň ýeňiş gazanjakdygyny çaklady. Bu barada BCA Research-iň gözlegine salgylanyp, “FourFourTwo” futbol neşiri habar berýär. Muny sport-interfax.ru ýetirýär.
Gözleg netijelerine laýyklykda, final duşuşygynda Argentinanyň milli ýygyndysynyň garşydaşy Portugaliýanyň milli topary bolar. Şoňa görä-de, toparlaryň liderleri bolan “Altyn topuň” ýedi gezek eýesi argentinaly Lionel Messi bilen bu baýragyň bäş gezek eýesi Kriştianu Ronaldunyň arasyndaky duele garaşylýar.
Esasy we goşmaça wagt deňme-deň tamamlanar, ýeňiji bolsa 11 metrlik urgy tapgyrynda kesgitlener.
Gözleg EA Sport FIFA simulýatoryndan oýunçylaryň statistikasyna esaslanýar, şeýle-de soňky dört dünýä çempionatynyň toparlaýyn tapgyrynyň 192 oýny we pleý-offunyň 64 duşuşygy göz öňünde tutuldy.
Katardaky dünýä çempionaty 20-nji noýabrdan 18-nji dekabr aralygynda geçiriler.
Häzirki dünýä çempiony Fransiýanyň milli ýygyndysy bolup, ol 2018-nji ýylda Russiýada geçirilen DÇ-de ýeňiş gazandy. Argentina – iki gezek dünýä çempiony we iki gezek kümüş baýrakçy. 2014-nji ýylda onuň düzüminde Messi kümüş baýragyň eýesi boldy. Dünýä çempionatlarynda Portugaliýanyň iň ýokary üstünligi 1966-njy ýyldaky DÇ-de bürünç baýraga mynasyp bolmagydyr.
