Dünýäniň iň uly alkogolsyz içgileri öndürijisi Coca-Cola Co. 2022-nji ýylyň üçünji çärýeginde arassa girdejisini 14% artdyryp, şu ýyl üçin çaklamasyny hem ýokarlandyrdy. Bu barada interfax.ru habar berýär.
Iýul – sentýabr aýlarynda kompaniýanyň arassa girdejisi bir ýyl ozalky 2,471 mlrd dollara ýa-da paý üçin 57 sente garşy 2,825 mlrd dollar ýa-da paý üçin 65 sent boldy. Bir gezeklik faktorlary hasaba almazdan düşewünt 7% - paý üçin 69 sente çenli ýokarlandy.
Girdeji 10,2% ýokarlanyp, 11,063 mlrd dollara ýetdi. Organiki öşüş 16% boldy.
Geçen çärýek Coca-Cola-nyň Demirgazyk Amerikada girdejisi 21%, EMEA sebitinde (Ýewropa, Ýakyn Gündogar, Afrika) 4%, Latyn Amerikasynda 12%, Aziýa-Ýuwaş umman sebitinde 4% ýokarlandy.
Natural aňlatmada satuw möçberi ýyllyk hasabynda 4% ýokarlandy. Şol sanda gazly içgileriň satuwy, esasan, Hindistanyň, Meksikanyň we Hytaýyň hasabyna 3% ýokarlandy. Şireli suwlaryň, süýtli içgileriň we ösümlik esasly içgileriň satuwy üýtgemedi, suwuň, sport içgileriniň, kofeniň we çaýyň satuwy bolsa 7% ýokarlandy.
Coca-Cola 2022-nji ýylyň jemi boýunça paý hasabynda düzedilen girdejiniň 6-7% ýokarlanmagyna garaşýar. Şeýle-de, kompaniýa girdejiniň organiki ösüşiniň öň çaklanan 12-13%-e garşy 14-15% bolmagyny göz öňünde tutýar.
2022-nji ýylyň başyndan bäri kompaniýanyň kapitallaşdyrmasy 2,8%, 242 mlrd dollara çenli peseldi.
