Germaniýanyň sport harytlaryny öndüriji Puma SE kompaniýasy 2022-nji ýylyň üçünji çärýeginde arassa girdejisini we girdejisini ýokarlandyrdy, ýöne çig malyň bahasynyň ýokarlanmagy sebäpli girdejililigiň peselendigini habar berdi. Muny interfax.ru ýetirýär.
Kompaniýanyň metbugat relizinde habar berlişi ýaly, iýul – sentýabr aýlarynda onuň arassa girdejisi geçen ýylyň degişli döwründäki 143,8 mln ýewrodan 146,4 mln ýewro çenli artdy. Hasabat döwründe salgyt we göterim töleglerinden öň düşewünt (EBIT) bir ýyl ozalky 229 mln ýewrodan 258 mln ýewro çenli ýokarlandy. Puma-nyň girdejisi bir ýyl ozalky 1,9 mlrd ýewrodan 2,35 mlrd ýewro çenli ýokarlandy.
Analitikler kompaniýanyň düşewündiniň 2,3 mlrd ýewro girdejide 163 mln ýewro derejesinde bolmagyny çaklapdylar.
Şol bir wagtyň özünde, umumy girdejililik çig malyň we harytlary daşamak hyzmatlarynyň bahalarynyň ýokarlanmagy sebäpli 46,8%-e çenli azaldy. Şeýle-de, Ukrainadaky wakalar, global energetika çökgünligi we Hytaýdaky çäklendiriji çäreler hem ýaramaz täsir etdi.
Muňa garamazdan, Puma-nyň ýolbaşçylygy 2022-nji ýyl üçin çaklamasyny tassyklady. Kompaniýa EBIT-iň 600 – 700 mln ýewro aralygynda bolmagyna we walýutanyň üýtgemegini hasaba almazdan girdejiniň 15-17% ösmegine garaşýar.
Ýylyň başyndan bäri kompaniýanyň kapitallaşdyrmasy iki esseden gowrak (57%), 6,68 mlrd ýewro çenli peseldi.
