ABŞ-nyň aeronawtika we älem giňişligini öwrenmek boýunça milli müdirligi (NASA) Halkara kosmos stansiýasynyň (HKS) daşynda gäminiň daşarky işlerini amala aşyrmagy täzeden dikeldýär diýip kosmiki pudagyň saýtynda habar berilýändigini Trend ýazýar.
HKS-iň amerikan segmentinde işleýän astronawtlar şu ýylyň martyndan bäri açyk äleme çykmandylar. Şonda stansiýanyň daşynda kebşirleme işlerini geçirmek üçin açyk kosmosa çykylan wagtynda nemes astronawty Mattias Maurer öz skafandrynyň şleminde çyg bardygyny görüpdi we gyssagly ýagdaýda daşyna çykmak bes edilipdi. Şondan soň NASA adatdan daşary ýagdaýyň sebäbi anyklanýança korablyň daşynda iş alyp barmagy togtatmagy karar etdi.
Müdirligiň berýän maglumatyna görä, hünärmenler ýagdaýy birin-birin öwrenip barladylar. Olar skafandry we ýüze çykarylan çygyň nusgalaryny öwrendiler we alnan maglumatlaryň esasynda meseläniň çeşmesi skafandrda däl-de, integrirlenen ulgamda diýen netijä geldiler, ulgamyň işi adatdakydan köp mukdardaky kondensantyň işlenip çykmagyna getiripdir.
Barlagyň netijeleri boýunça "HKS-iň bortundan meýilleşdirilen açyk äleme çykmalary täzeden dikeltmäge rugsat bermeli" diýen karara geldiler.
