Abuna ýazylyşyk esasynda dünýäniň iň uly wideo akym hyzmaty bolan Netflix Inc.-iň abunaçylarynyň sany üçünji çärýekde 2,41 mln birlik artdy diýlip, kompaniýanyň metbugat relizinde habar berilýär. Muny interfax.ru ýetirýär.
FactSet tarapyndan sorag edilen analitikler görkezijiniň 1,1 mln birlik ösüşine garaşypdylar. Geçen iki çärýek abunaçylaryň sany jemi 1,2 mln birlik azaldy.
Şol bir wagtyň özünde, kompaniýanyň iýul – sentýabr aýlarynda arassa girdejisi geçen ýylyň degişli döwründäki 1,4 mlrd dollar ýa-da paý üçin 3,16 dollar bilen deňeşdirilende, 1,45 mlrd dollar ýa-da paý üçin 3,1 dollar boldy. Girdeji 6% ýokarlanyp, 7,93 mlrd dollara ýetdi.
Analitikler kompaniýanyň arassa girdejisiniň ortaça 7,84 mlrd dollar girdejide paý üçin 2,14 dollar derejesinde bolmagyny çaklapdylar.
Dördünji çärýekde Netflix abunaçylarynyň sanyny 4,5 mln birlik, girdejisini geçen ýylyň oktýabr – dekabr aýlaryndaky 7,71 mlrd dollardan 7,78 mlrd dollara çenli artdyrmagy meýilleşdirýär. Çaklama abunaçylaryň sanynyň 4 mln, girdejiniň 7,97 mlrd dollara çenli artmagyny göz öňünde tutýar.
Ýylyň başyndan bäri kompaniýanyň kapitallaşdyrmasy 60%, 109 mlrd dollara çenli peseldi.
