Britaniýaly boksçy Taýson Fýuriniň indiki söweşiniň senesi belli boldy. Bu barada Twitterde International Boxing News habar berýär diýip, lenta.ru belleýär.
Portalyň maglumatlaryna görä, 3-nji dekabrda Fýuri watandaşy Derek Çisora bilen duşuşar. Söweş Londondaky “Tottenhem Hotspur” stadionynda geçiriler. Boksçylar Bütindünýä boks geňeşiniň (WBC) wersiýasyna görä agyr agramda dünýä çempionynyň guşagy üçin söweşerler.
26-njy sentýabrda Fýuri dekabr aýyna meýilleşdirilen watandaşy Entoni Joşua bilen söweşiň ýatyrylýandygyny habar berdi. Türgen söweş şertnamasyna wagtynda gol çekilmändigini düşündirdi. Ol ringde germaniýaly Manuel Çarr bilen duşuşmak isleýändigini hem sözüniň üstüne goşdy.
Fýuri – agyr agramda WBC-niň wersiýasy boýunça häzirki dünýä çempiony. Onuň hasabynda 33 ýeňiş bar, ol ýekeje gezek-de ýeňilmedi, bir söweş bolsa deňme-deňlikde tamamlandy. Çisoranyň hasabynda 33 ýeňiş we 12 ýeňliş bar.
