Ekologiýa meseleleri bilen meşgullanýan hökümete degişli bolmadyk gurama WEEE Forum 2022-nji ýylda 5,3 mlrd smartfonyň we ykjam telefonyň elektron zibile öwrüljekdigini anyklady. Bu barada “The Register” neşiri habar berýär diýip, incrussia.ru belleýär.
Hünärmenleriň maglumatlaryna görä, 5,3 mlrd – bu häzirki wagtda bütin dünýäde ulanylýan ykjam gurluşlaryň umumy sanynyň üçden birine deňdir. WEEE Forum eger ähli köne telefonlary we smartfonlary biri-biriniň üstünde goýsaň, beýikligi, takmynan, 50 müň km bolan diňiň emele geljekdigini hasaplady. Bu bolsa Ýeriň kosmos hemralarynyň köpüsiniň uçuş belentliginden hem ýokarydyr.
Şonuň bilen birlikde, gurama tas 9 müň maşgala bilen geçirilen pikir soraşmanyň netijelerini-de hödürledi. Oňa laýyklykda, adamlaryň 46%-i köne ykjam gurluşlary gaýtadan işlemek üçin hem bermän, özünde saklaýar. Ýene 15%-i kimdir birine satmak ýa-da bermek üçin köne gajetleri saklap galýar. Takmynan, 13%-i sentimental sebäplere görä ykjam gurluşyndan aýrylyp bilmeýär.
Häzirki wagtda dünýäde 16 mlrd ykjam telefon hasaba alynýar – Ýewropada olaryň üçden biri diýen ýaly ulanylmaýar. WEEE-niň hasabyna görä, elekton zibilleriň “dagy” 2030-njy ýyla çenli ýylda 74 mln tonna çenli ýokarlanar.
