Şu gün irden iri halkara çärelere gatnaşmak, şeýle-de doganlyk ýurda ilkinji döwlet saparyny amala aşyrmak maksady bilen Gazagystanda bolýan Prezident Serdar Berdimuhamedow Astana şäherinde ýerleşýän Watan goragçylarynyň ýadygärligine gül goýmak dabarasyna gatnaşdy. Bu ýerde Astana şäheriniň häkimi döwlet Baştutanynyň ýanynda boldy. Bu barada «Türkmenistan» gazetiniň elektron neşiri ýazýar.
«Watan goragçylary» meýdançasynda ýerleşýän ýadygärligiň etegine gül dessesini goýup, döwlet Baştutany Gazagystanyň halk gahrymanlaryny hatyralady.
Gazagystanda ýaşaýan ähli halklaryň jebisligini alamatlandyrýan Watan goragçylarynyň ýadygärligi 2001-nji ýylda açyldy. Esasy meýdançadaky suw çüwdürimleri, barelýeflerdäki batyrgaý keşpler, ýas tutýan enäniň heýkeli we «Baky ot» halkyň edermenligini ýada salýar. Gazagystana sapar bilen barýan daşary ýurtlaryň döwlet Baştutanlarynyň bu ýadygärlige gül desselerini goýmaklary asylly däbe öwrüldi.
