Dünýädäki iň uly lýuks harytlaryny öndüriji LVMH 2022-nji ýylyň üçünji çärýeginde girdejisini 27% ýokarlandyrdy. Bu hem bazaryň çaklamalaryndan ýokary boldy diýip, Interfax.ru habar berýär.
Kompaniýanyň metbugat relizinde aýdylyşy ýaly, iýul – sentýabr aýlarynda onuň girdejisi geçen ýylyň degişli döwründäki 15,51 mlrd ýewro bilen deňeşdirilende 19,76 mlrd ýewro boldy. Satuwyň organiki ösüşi 19% boldy.
FactSet tarapyndan sorag edilen hünärmenler onuň girdejisiniň ortaça 19,1 mlrd ýewro derejesinde bolmagyny çaklapdylar.
Kompaniýanyň Ýewropadaky, ABŞ-daky we Ýaponiýadaky girdejisi ýerli sarp edijiler tarapyndan durnukly islegiň we halkara syýahatçylygynyň dikelmeginiň netijesinde ýylyň başyndan bäri ep-esli ýokarlandy diýip, metbugat relizinde bellenilýär. Aziýada üçünji çärýekde karantin çäklendirmeleriniň gowşadylmagy netijesinde ýagdaý gowulaşsa-da, girdejiniň şu ýyl ösüş depgini has pesdir.
LVMH-iň moda egin-eşikleri we deri önümleri segmentinde girdejisi üçünji çärýekde 30% ýokarlanyp, 9,69 mlrd ýewro ýetdi. Satuwyň organiki ösüşi 22% boldy.
Alkogol içgileriniň satuwy 23%, 1,9 mlrd ýewro çenli, parfýumeriýanyň we kosmetikanyň satuwy 19%, 1,96 mlrd ýewro çenli, sagatlaryň we şaý-sepleriň satuwy 25%, 2,67 mlrd ýewro çenli ýokarlandy.
Ulgamlaýyn ownuk söwda dükanlarynyň girdejisi 28% ýokarlanyp, 3,47 mlrd ýewro ýetdi.
2022-nji ýylyň dokuz aýynda LVMH-iň girdejisi 28%, 56,5 mlrd ýewro çenli ýokarlandy. Ýylyň başyndan bäri organiki ösüş 20% boldy.
