Tesla kompaniýasynyň ýolbaşçysy Ilon Mask adam şekilli robot Optimus-yň prototipini görkezdi. Bu barada TASS habar berýär.
“Tesla-da emeli intellekt güni” çäresiniň dowamynda robotyň synag prototipi sahna çykyp, zalda oturanlara elini galgatdy. Soňra Mask robotyň gutyny bir ýerden başga ýere geçirýän we gülleri suwarýan wideosyny görkezdi.
Şol bir wagtyň özünde, Mask “Optimus-y kämilleşdirmek we synagdan geçirmek üçin ýene köp işleriň bardygyny" belledi. Onuň çaklamalaryna görä, robot 5-10 ýyldan kämil bolar.
Robot Tesla tarapyndan taýýarlanan komponentleri, şol sanda akkumulýator batareýasyny, çip ulgamyny, şeýle-de el-aýaklary dolandyrmak üçin herekete getirijileri ulanar. Oňa Tesla elektromobillerinde ulanylýan awtodolandyryjy ulgam hem oturdylar.
Telekeçi robotyň bahasynyň 20 müň dollardan az boljakdygyny belleýär.
Tesla-nyň ýolbaşçysy roboty döretmek pikirini 2021-nji ýylyň awgust aýynda aýtdy. Şol wagt hödürlenen taslama görä, Optimus adam boýy bilen deň bolar, 20 kg töweregi agramy göterip, adama gündelik işleri ýerine ýetirmäge kömek edip biler. Telekeçiniň aýtmagyna görä, akylly mehanizm adamyň etmek islemeýän işlerini edip biler, mysal üçin, azyk önümlerini almak üçin dükana gider.
