28-nji sentýabr Prezident Serdar Berdimuhamedow Halkara ahalteke atçylyk sport toplumynda Türkmenistanyň Garaşsyzlygynyň 31 ýyllygyna bagyşlanyp geçirilen dabaralara gatnaşdy.
TmCars.info-nyň habar berşi ýaly, şu gün bu ýerde baýramçylyk at çapyşyklary geçirildi. Şu gün ahalteke bedewleri ýedi çapyşykda dürli aralyklarda öz okgunlylygyny, ýyndamlygyny hem-de çeýeligini görkezdiler.
1 müň 600 metr aralyga ilkinji üç çapyşykda üçýaşar bedewler ýaryşdylar.
Geçirilen ilkinji çapyşykda 1 minut 48,2 sekunda deň bolan iň gowy netijäni Türkmenistanyň Prezidentiniň Ahalteke atçylyk toplumyna degişli Döwran atly dor at görkezdi.
Ikinji çapyşykda pellehana ilkinji bolup 1 minut 50,5 sekunt netije bilen Milli howpsuzlyk ministrliginiň Bäsleşik atly dor aty geldi.
Üçünji çapyşykda 1 minut 49,4 sekunda deň bolan iň gowy netijäni Türkmenistanyň Prezidentiniň Ahalteke atçylyk toplumyna degişli Günaý atly dor gysrak görkezdi.
Galan çapyşyklarda dörtýaşar we ondan uly bedewler ýaryşdylar.
1 müň 800 metr aralyga dördünji çapyşykda pellehana ilkinji bolup “Türkmenaragatnaşyk” agentliginiň Ýantar atly dor aty geldi. Ol 2 minut 05,8 sekunt netije görkezdi.
Şolar ýaly aralyga geçirilen bäşinji çapyşykda 2 minut 02,0 sekunt netije bilen pellehana ilkinji bolup Türkmenistanyň Prezidentiniň Ahalteke atçylyk toplumyna degişli Nowruz atly dor at geldi.
2 müň 200 metr aralyga altynjy çapyşykda Aşgabat şäheriniň häkimliginiň Ýagmyr atly dor aty 2 minut 36,20 sekunt netije bilen pellehana ilkinji bolup geldi.
Türkmenistanyň Prezidentiniň baýragyny almak ugrunda 2 müň 200 metr aralykdaky jemleýji, ýedinji çapyşykda Türkmenistanyň Prezidentiniň Ahalteke atçylyk toplumyna degişli Bezirgen atly akýal mele aty pellehana ilkinji bolup geldi. Ol 2 minut 31,3 sekunt netije görkezdi.
Soňra ýaryşyň ýeňijilerini sylaglamak dabarasy boldy.
